பழுத்த மரம் வௌவாலை வாவென்று கூவி அழைப்பதில்லை !
----------------------------------------------------------------------------------------------------
தமிழ் மூதாட்டி ஔவையார் அருளிச் செயத பல
நூல்களுள் நல்வழியும் ஒன்று. அதிலிருந்து, கொடையாளருக்கு எல்லாரும் உறவினரே என்பதை
வலியுறுத்தும் ஒரு பாடல் !
----------------------------------------------------------------------------------------
பாடல்.(29) மரம் பழுத்தால் ஔவாலை வாவென்று !
-----------------------------------------------------------------------------------------
மரம்பழுத்தால் வௌவாலை வாவென்று கூவி
இரந்தழைப்பார் யாவரு மங்கில்லை - சுரந்தமுதம்
கற்றா தரல்போற் கரவாது அளிப்பரேல்
உற்றார் உலகத் தவர்.
---------------------------------------------------------------------------------------
சந்தி பிரித்து எழுதிய பாடல்.
---------------------------------------------------------------------------------------
மரம் பழுத்தால் வௌவாலை வா என்று கூவி
இரந்து அழைப்பார் யாவரும் அங்கில்லை – சுரந்து அமுதம்
கன்று ஆ தரல்போல் கரவாது அளிப்பரேல்
உற்றார் உலகத்தவர்.
-----------------------------------------------------------------------------------------
சொற்பொருள்:
-----------------------------------------------------------------------------------------
மரம் பழுத்தால் = மரத்தில் காய்கள் முற்றிப் பழுத்திருந்தால் ; வௌவாலை = பழத்தைத் தின்று பசியாறும் வௌவாலை ; வா என்று கூவி = ”வா” “வா” என்று கூவி ; இரந்து அழைப்பார் = வருந்தி அழைப்பவர்கள் ; யாவரும் அங்கு இல்லை = அம் மரத்தருகில் ஒருவருமில்லை ; கன்று ஆ (கற்றா) = கன்றை உடைய பசு ; அமுதம் சுரந்து தருதல் போல் = பாலைச் சுரந்து கொடுத்தல்போல் ; கரவாது அளிப்பரேல் = ஏழை எளியவர்க்கு “இல்லை” என்று சொல்லாமல், (ஒளிக்காமல்,) தம்மிடம் உள்ள மிகுதியான செல்வத்தைக் கொடுத்து அவர்தம் துன்பத்தைத் தீர்ப்பாராயின் ; உலகத்தவர் உற்றார் = உலகத்தார் (அவ் வௌவால் போலத் தாமே வந்து ) ஈகையாளருக்கு உறவினர் ஆகிவிடுவார் !
-----------------------------------------------------------------------------------------
பொருளுரை:
-------------------------------------------------------------------------------------------------
மரம் பழுத்திருந்தால், வௌவாலை “வா”, “வா’ என்று
கூவி அழைப்பவர்கள் அங்கு
யாரும் இல்லை. அந்த மரம்தான் பழத்தின் நறுமணத்தால் வௌவாலை ஈர்த்துப் பழத்தை
உண்ண அளிக்கிறது !
கன்றை உடைய பசு, தான்
ஈன்ற கன்றுக்கும், தனக்கு உணவளித்து
வளர்க்கும் மனிதருக்கும் தன்னிடம் உள்ள பாலை ஒளித்து வைத்துக்கொள்ளாமல் தானாகவே சுரந்து அளிக்கிறது !
அதுபோல், மிகுதியாக உள்ள செல்வத்தைத் தமக்கென ஒளித்து வைத்துக் கொள்ளாமல் ஏழை
எளியவர்க்குத் தந்து துன்பம்
தீர்ப்பாராயின், வௌவாலைப்போல் தாமே வந்து உலகத்தார் அனைவரும் அவருக்கு உறவினர் ஆகிடுவர் !
-----------------------------------------------------------------------------------------
சுருக்கக் கருத்து:
-----------------------------------------------------------------------------------------
கொடையாளர்க்கு அனைவருமே உறவினர்கள்
தான் !
-----------------------------------------------------------------------------------------
ஆக்கம் + இடுகை:
வை.வேதரெத்தினம்,
(veda70.vv@gmail.com)
ஆட்சியர்,
"நல்வழி” வலைப்பூ,
[தி.ஆ: 2051, சிலை (மார்கழி) 21]
{05-01-2022}
----------------------------------------------------------------------------------------
