செல்வந்தனை உலகம் போற்றும் !
------------------------------------------------------------------------------------------
நல்வழி என்பது ஔவையார் என்னும் தமிழ்
மூதாட்டியார் அருளிய செவ்விய தமிழ் நூல்களுள் ஒன்று. இந்நூல் கி.பி. 9-ஆம்
நூற்றாண்டிற்குப் பின் தோன்றியது என்பது அறிஞர்களின் கருத்து !
------------------------------------------------------------------------------------------
பாடல் (34) கல்லானே யானாலும் !
------------------------------------------------------------------------------------------
கல்லானே யானாலுங் கைப்பொருளொன்
றுண்டாயின்
எல்லாருஞ் சென்றங்கு எதிர்கொள்வர் – இல்லானை
இல்லாளும் வேண்டாள்மற்று ஈன்றெடுத்த
தாய்வேண்டாள்
செல்லாது அவன்வாயிற் சொல் !
-----------------------------------------------------------------------------------------
சந்தி பிரித்து எழுதிய பாடல்:
-----------------------------------------------------------------------------------------
கல்லானே ஆயினும் கைப் பொருள் ஒன்று
உண்டாயின்
எல்லாரும் சென்று அங்கு எதிர்கொள்வர்; - இல்லானை
இல்லாளும் வேண்டாள்; மற்று ஈன்று எடுத்த
தாய் வேண்டாள்;
செல்லாது அவன் வாயில் சொல் !
------------------------------------------------------------------------------------------
பொருளுரை:
------------------------------------------------------------------------------------------
கல்வியறிவு இல்லாத மனிதனாக
இருந்தாலும் அவனிடம் பொருட் செல்வம் இருக்குமேல் எல்லா மக்களும் சென்று அவனைப்
பார்த்துப் போற்றிப் புகழ்வர் !
பொருள் இல்லாத மனிதனாக இருந்தால், அவனுக்கு மாலையிட்டு
மணந்த மனைவியும் கூட விரும்பாள்; அவனை ஈன்றெடுத்த தாயும்
விரும்பாள் !
பொருள் இல்லாத வறிய மனிதனின் சொல்லை
இந்த உலகம் துளிக்கூட மதிக்காது;
பிற மனிதர்கள் அவனை ஏளனமாகவே
பார்ப்பார்கள் !
------------------------------------------------------------------------------------------
அருஞ்சொற்பொருள்;
------------------------------------------------------------------------------------------
கல்லானே ஆனாலும் கைப்பொருள் ஒன்று
உண்டாயின் = (ஒருவன்) படியாதவனே ஆயினும் (அவன்)
கையிலே பொருள் மாத்திரம் இருந்தால் ; எல்லாரும்
சென்று எதிர்கொள்வர் = (அவனை) யாவரும்
போய் எதிர்கொண்டு உபசரிப்பர் ; இல்லானை இல்லாளும் வேண்டாள் =
(படித்தவனே ஆயினும் பொருள்) இல்லாதவனை (அவன்) மனைவியும் விரும்பாள் ; ஈன்று
எடுத்த தாய் வேண்டாள் = (அவனைப்) பெற்று
வளர்த்த அன்னையும் விரும்பாள் ;அவன் வாயில் சொல் செல்லாது =
அவன் வாயிற் பிறக்கும் சொல்லானது பயன்படாது !
------------------------------------------------------------------------------------------
கருத்துச் சுருக்கம்:
------------------------------------------------------------------------------------------கல்லாதவனேயாயினும் பொருள் உடையவனை எல்லாரும் மதிப்பர்; கற்றவனே ஆயினும் பொருள் இல்லாதவனை ஒருவரும் மதியார் !
------------------------------------------------------------------------------------------
ஆக்கம் + இடுகை:
வை.வேதரெத்தினம்,
(veda70.vv@gmail.com)
ஆட்சியர்,
”நல்வழி” வலைப்பூ,
[தி.ஆ: 2051, சிலை (மார்கழி) 21]
{05-01-2022}
--------------------------------------------------------------------------------------------------------
