நெய்யில்லாத உணவு உடல் நலத்தைக் கெடுக்கும் !
-----------------------------------------------------------------------------------------
நல்வழி
என்பது ஔவையார் என்னும் தமிழ் மூதாட்டியார் அருளிய செவ்விய தமிழ் நூல்களுள் ஒன்று.
இந்நூல் கி.பி. 9-ஆம் நூற்றாண்டுக்குப் பின்
தோன்றியது என்பது அறிஞர்களின் கருத்து !
-----------------------------------------------------------------------------------------
பாடல்:
(24) நீறில்லா நெற்றி பாழ்!
-----------------------------------------------------------------------------------------
நீறில்லா
நெற்றிபாழ் நெய்யில்லா உண்டிபாழ்
ஆறில்லா
ஊருக் கழகுபாழ் – மாறில்
உடன்பிறப்
பில்லா உடம்புபாழ் பாழே
மடக்கொடி
இல்லா மனை !
-----------------------------------------------------------------------------------------
சந்தி
பிரித்து எழுதிய பாடல்:
-----------------------------------------------------------------------------------------
நீறு
இல்லா நெற்றி பாழ் நெய் இல்லா உண்டி பாழ்
ஆறு இல்லா
ஊருக்கு அழகு பாழ் – மாறு இல்
உடன்பிறப்பு
இல்லா உடம்பு பாழ் பாழே
மடக்கொடி
இல்லா மனை !
------------------------------------------------------------------------------------------
அருஞ்சொற்பொருள்:
------------------------------------------------------------------------------------------
நீறு
இல்லா நெற்றி பாழ் = (மண்டை நீரேற்றத்தைத் தடுக்கும்என்பதால்)
திருநீறு அணியாத நெற்றியினால் நன்மையில்லை ; நெய்
இல்லா உண்டி பாழ் = (புளிப்பினால் ஏற்படும் குடல் அரிப்பைத் தடுக்கும்
என்பதால், உணவில் நெய் சேர்க்க வேண்டும்) நெய் சேர்க்காத உணவினால் குடலுக்கு நன்மையில்லை ; ஆறு
இல்லா ஊருக்கு அழகு பாழ் = (ஊருக்கு நீர்வளமும் நிலவளமும் சேர்ப்பது ஆறு. ஆகையால்) ஆறு இல்லாத ஊருக்கு அதனால் ஏற்படும் பயன்கள்
கிடைக்காமற் போகும் ; மாறு இல் உடன் பிறப்பு இல்லா உடம்பு பாழ் = (பற்றுக்கொண்ட
உடன்பிறப்பு என்றும் பலம் தரும்) துணை வலி சேர்க்கும் அண்ணன்,
தம்பி இல்லாதவன் சண்டை சச்சரவில் ஈடுபட்டால், அவன்
உடம்பு புண்ணாகும் ; மனைவி இல்லாத வீடு களை இழந்து உருக்குலைந்து
போகும்.
------------------------------------------------------------------------------------------
பொருளுரை:
------------------------------------------------------------------------------------------
நெற்றியில்
தரிக்கும் திருநீறு மண்டை நீரேற்றத்தைத் தடுக்கிறது. எனவே,
திருநீறு அணியத் தவறுவதால் நமது நெற்றியின் பயனே வீணாகிப் போகும் (பாழாகும்) !
புளிப்பு (அமிலம்) சேர்ந்த
உணவு குடலை அரித்துப் புண்ணாக்கும். நெய் சேர்ந்த உணவு குடல் அரிப்பைக் தடுக்கிறது.
ஆகையால் நெய் இல்லாத நிலையில் உண்ணும் உணவின் பயனே வீணாகிப் போகும் (பாழாகும்) !
நீர்வளமும்
நிலவளமும் பெருக்குவது ஆறு. ஆறு இல்லாத ஊரில் நெல்வளமும் குறைவு., எனவே, ஆறில்லாவிடில் ஊரின் அழகே வீணாகிப் போகும் (பாழாகும்)
!
பற்றுக்
கொண்ட உடன்பிறப்பு, துணை வலியைப் பெருக்கும்.
துணைவலி இன்மை நிலை உடம்புக்கு ஊறு தரும் . எனவே
உடன்பிறப்பு இல்லையேல் நம் உடல் நலமே வீணாகிப் போகும் (பாழாகும்)
!
இல்லத்துக்கு
அழகு இன்சொல் மனைவி. மனையாள் இல்லாத வீடு அதன் இயல்பான
பொலிவை இழந்து போகும். எனவே மனைவி இல்லையேல் இல்லத்தின் எழிலே
வீணாகிப் போகும் (பாழாகும்) !
-----------------------------------------------------------------------------------------
சுருக்கக்
கருத்து:
------------------------------------------------------------------------------------------
திருநீற்றினாலே
நெற்றியும், நெய்யினாலே உணவும், ஆற்றினாலே
ஊரும், துணைவராலே உடம்பும், மனைவியினாலே
வீடும் சிறப்படையும் !
-----------------------------------------------------------------------------------------
ஆக்கம்
+ இடுகை:
வை.வேதரெத்தினம்,
(veda70.vv@gmail.com)
ஆட்சியர்,
"நல்வழி” வலைப்பூ,
[தி.ஆ: 2051, சிலை (மார்கழி) 22]
{06-01-2022}
-----------------------------------------------------------------------------------------
