பிழையுடைய பாட்டைவிட உரைநடை மேலானது !
----------------------------------------------------------------------------------------
நல்வழி
என்பது ஔவையார் என்னும் தமிழ் மூதாட்டியார் அருளிய செவ்விய தமிழ் நூல்களுள் ஒன்று.
இந்நூல் கி.பி. 9-ஆம் நூற்றாண்டுக்குப் பின்
தோன்றியது என்பது அறிஞர்களின் கருத்து !
---------------------------------------------------------------------------------------
பாடல்:
(31) இழுக்குடைய பாட்டிற்கு !
----------------------------------------------------------------------------------------
இழுக்குடைய
பாட்டிற்கு இசைநன்று சாலும்
ஒழுக்கம்
உயர்குலத்தின் நன்று – வழுக்குடைய
வீரத்தின்
நன்று விடாநோய் பழிக்கஞ்சாத்
தாரத்தின்
நன்று தனி !
----------------------------------------------------------------------------------------
சந்தி
பிரித்து எழுதிய பாடல்:
----------------------------------------------------------------------------------------
இழுக்கு
உடைய பாட்டிற்கு இசை நன்று; சாலும்
ஒழுக்கம்
உயர் குலத்தின் நன்று; - வழுக்கு உடைய
வீரத்தின்
நன்று விடா நோய்; பழிக்கு அஞ்சாத்
தாரத்தின்
நன்று தனி !
-----------------------------------------------------------------------------------------
அருஞ்சொற்பொருள்:
-----------------------------------------------------------------------------------------
இழுக்கு
உடைய பாட்டிற்கு இசை நன்று = இலக்கண வழுக்களை உடைய செய்யுளினும்
(அஃதில்லாத) வழக்கு நல்லது ; உயர் குலத்தின் சாலும் ஒழுக்கம் நன்று = உயர்குலத்தினும்
(அஃதில்லாத) மாட்சிமைப் பட்ட ஒழுக்கம் நல்லது
; வழுக்கு உடைய வீரத்தின் விடா நோய் நன்று = தவறுதலை
உடைய வீரத்தினும் தீராப் பிணி நல்லது ; பழிக்கு அஞ்சாத் தாரத்தின்
தனி நன்று = பழிச் சொல்லுக்கு அஞ்சாத மனைவியோடு கூடி வாழ்தலினும்
தனியே இருத்தல் நல்லது.
-----------------------------------------------------------------------------------------
பொருளுரை:
-----------------------------------------------------------------------------------------
இலக்கணப்
பிழைகள் நிறைந்த செய்யுள் எழுதிக் கருத்துச் சொல்வதைவிட, செய்யுள் அல்லாத உரைநடையில் ஒரு கருத்தைச் சொல்வது மேலானது !
வாழ்க்கையில்
நல்லொழுக்கம் உடையவராகத் திகழ்தல் என்பது,
உயர் குலத்தில் பிறப்பதைவிடவும் மிகவும் மேலானது
!
பகைவரை எதிர்கொண்டு நுண்ணறிவு (விவேகம்) இல்லாது வீரத்தைக் காட்டித் தோற்பதைவிட, நோயாளியாகவே வாழ்தல் மேலானது !
தவறு செய்தால் பழிநேருமே என்று அஞ்சாத மனைவியுடன் காலமெல்லாம் வாழ்வதைக் காட்டிலும் தனியனாக வாழ்தலே மேலானது !
-----------------------------------------------------------------------------------------
சுருக்கக்
கருத்து:
-----------------------------------------------------------------------------------------
இலக்கணப்
பிழை உடைய பாட்டும், நல்லொழுக்கமில்லாத உயர்குலமும்,
தவறுதலை உடைய வீரமும், கற்பில்லாத மனைவியோடு கூடிய
இல்வாழ்க்கையும் தீரா வசையை விளைவிக்கும்.
-----------------------------------------------------------------------------------------
ஆக்கம்
+ இடுகை:
வை.வேதரெத்தினம்,
(veda70.vv@gmail.com)
ஆட்சியர்,
”நல்வழி” வலைப்பூ,
[தி.ஆ: 2051, சிலை (மார்கழி) 21]
{05-01-2022}
-----------------------------------------------------------------------------------------
