உள்ளதே போதும் என மன அமைதி கொள்க !
---------------------------------------------------------------------------------------------------
ஔவையார் அருளிச் செய்த நல்வழி என்னும்
நூலிலிருந்து ஒரு அருமையான பாடல். மனித
வாழ்க்கையில் மன அமைதியின் தேவையை வலியுறுத்துகிறது இந்தப் பாடல்.
-----------------------------------------------------------------------------------------
பாடல் (28) உண்பது நாழி உடுப்பது !
-----------------------------------------------------------------------------------------
உண்பது நாழி ! உடுப்பது நான்கு முழம் !
எண்பது கோடி நினைந்து எண்ணுவன -
கண்புதைந்த
மாந்தர் குடிவாழ்க்கை மண்ணின் கலம்போலச்
சாந்துணையும் சஞ்சலமே தான் !
-----------------------------------------------------------------------------------------
சந்தி பிரித்து எழுதிய பாடல்:
------------------------------------------------------------------------------------------
உண்பது நாழி, உடுப்பது நான்கு
முழம்
எண்பது கோடி நினைந்து எண்ணுவன – கண் புதைந்த
மாந்தர் குடிவாழ்க்கை மண்ணின் கலம்
போலச்
சாம் துணையும் சஞ்சலமே தான் !
------------------------------------------------------------------------------------------
அருஞ்சொற்பொருள்:
------------------------------------------------------------------------------------------
நாழி = முற்காலத்தில் வழக்கில் இருந்த ஆழாக்கு என்னும் முகத்தல் அளவை. ; நினைந்து எண்ணுவன எண்பது கோடி = நினைத்து என்னும் காரியங்களோ எண்பது கோடி (அதாவது பற்பல என்று பொருள்) ; கண் புதைந்த = அகக்கண் குருடாக இருக்கிற ; மண்ணின் கலம் = மண்ணால் செய்யப்பட்டு சூளையில் வேகவைக்கப் பெற்ற பானை, சட்டி போன்றவை ; சாந்துணையும் = சாகும் வரையிலும் ; சஞ்சலமே = (அவர்க்குத்) துன்பமாகவே இருக்கிறது !
------------------------------------------------------------------------------------------
வடசொல்:
சஞ்சலம் = மனக்கவலை
------------------------------------------------------------------------------------------
சொல் விளக்கம்:
------------------------------------------------------------------------------------------
நாழி = முற்காலத்தில் வழக்கிலிருந்த முகத்தல் அளவைக்
கருவி. இதைப் “படி” என்பார்கள்.
------------------------------------------------------------------------------------------
பொருளுரை:
--------------------------------------------------------------------------------------------------
மனிதன் உண்பதற்கு நாழியளவுச் சோறும் உடுப்பதற்கு நான்கு முழத் துணியும் தேவை ! இந்த அளவை விஞ்சி அவனால் துய்க்க முடியாது !
இத்தகைய சிறிய
தேவையுள்ள மனிதனின் மனதில் எண்பது கோடி விழைவுகள்
(ஆசைகள்) தோன்றி
அவனை ஆட்டுவிக்கின்றன !
வீணான விழைகளுக்கு இடம் தந்து சிந்திக்கும் திறனை இழக்கும் மனிதன் இருப்பதை வைத்துக் கொண்டு நிறைவாக வாழத் தெரியாமல் துன்பப்படுகிறான்
!
அவனது அகக் கண் குருடாகிப் போகிறது. இதனால்
அவன் வாழ்க்கையானது எளிதில் உடைந்து விடும் மண் கலம் போன்று சாகும் வரை அவனுக்குத் துன்பம்
அளிப்பதாகவே அமைந்து விடுகிறது !
----------------------------------------------------------------------------------------------------
சுருக்கக் கருத்து:
-----------------------------------------------------------------------------------------
உள்ளதே போதும் என மனம் அமைதி பெறாதவர்கள் இறக்கும் வரையில் மனக் கவலையே அடைவார்கள் !
-----------------------------------------------------------------------------------------
ஆக்கம் + இடுகை:
வை.வேதரெத்தினம்,
(veda70.vv@gmail.com)
ஆட்சியர்,
”நல்வழி” வலைப்பூ,
[தி.ஆ: 2051, சிலை (மார்கழி) 22]
{06-01-2022}
-----------------------------------------------------------------------------------------
