பிறன் மனைவி மேல் அவாக் கொள்ளல் அழிவுக்கு வித்தாகும் !
------------------------------------------------------------------------------------------
நல்வழி என்பது ஔவையார் என்னும் தமிழ்
மூதாட்டியார் அருளிய செவ்விய தமிழ் நூல்களுள் ஒன்று. இந்நூல் கி.பி. 9-ஆம்
நூற்றாண்டிற்குப் பின் தோன்றியது என்பது அறிஞர்களின் கருத்து !
------------------------------------------------------------------------------------------
பாடல்.36. நண்டு சிப்பி, வேய், கதலி !
-----------------------------------------------------------------------------------------
நண்டுசிப்பி வேய்கதலி
நாசமுறுங் காலத்தில்
கொண்ட கருவளிக்குங்
கொள்கைபோல் - ஒண்டொடீ
போதந் தனங்கல்வி
பொன்றவருங் காலமயல்
மாதர்மேல் வைப்பார்
மனம்.
---------------------------------------------------------------------------------------
சந்தி பிரித்து எழுதிய பாடல்:
---------------------------------------------------------------------------------------
நண்டு, சிப்பி, வேய், கதலி, நாசம் உறும் காலத்தில்
கொண்ட கரு அளிக்கும் கொள்கை போல் – ஒண் தொடீ
போதம், தனம், கல்வி பொன்ற வரும்
காலம் அயல்
மாதர் மேல் வைப்பார் மனம் !
---------------------------------------------------------------------------------------
அருஞ்சொற்பொருள்;
----------------------------------------------------------------------------------------
ஒண் தொடீ ! = ஒளி பொருந்திய வளையல்களை அணிந்திருக்கும் பெண்ணே ! ; நண்டு = நீரில் வாழும் நண்டு; சிப்பி = கடலில் வாழும் முத்துச் சிப்பி; வேய் = மூங்கில்; கதலி = வாழை ; நாசமுறும் காலத்தில் = தாம் அழிவை அடையும் காலத்திலே; கொண்ட கரு அளிக்கும் கொள்கை போல் = (முறையே தாம்) கொண்ட (குஞ்சும், முத்தும், அரிசியும், காய்க் குலையும் ஆகிய கருக்களை ஈனும் தன்மை போல ; (மனிதர்கள்) போதம், தனம், கல்வி பொன்ற வரும் காலம் = ஞானமும், செல்வமும், கல்வியும் அழிய வரும் காலத்திலே ; அயல் மாதர் மேல் மனம் வைப்பார் = பிற மகளிர் மேல் அவாக் கொண்டு அவர்களை அடைய முயல்வார்கள் !
---------------------------------------------------------------------------------------
வடசொல்:
நாசம் = அழிவு
போதம் = ஞானம்
தனம் = செல்வம்
மாதர் = மகளிர்.
-----------------------------------------------------------------------------------------
பொருளுரை:
-----------------------------------------------------------------------------------------
தாய் ஈன்ற குட்டி நண்டுகள், தாயையே தின்று வளரும். சிப்பிகள் உடைந்த பின்பே அவற்றின் வயிற்றிலிருந்து முத்துக்கள் பிறக்கும். மூங்கில் தூர்களில் அரிசி (மூங்கிலரிசி) விளைந்த பின் அவை பட்டுப்போகும். வாழை மரம் தார் ஈன்றபின் தாய் வாழை மடிந்து போகும் ! இவையெல்லாம் தாம் கொண்ட கருக்களை ஈனும் காலத்தில் அழிந்து போகின்றன.
அதுபோல், தாம் பெற்ற அறிவு,
செல்வம், கல்வி ஆகிய அனைத்தும் அழிந்து போகும் காலத்தில்தான் ஆடவர் அயலார் வீட்டுப்
பெண்கள் மேல் தவறான அவாக் கொள்வர்!
-----------------------------------------------------------------------------------------
கருத்துச் சுருக்கம்:
-----------------------------------------------------------------------------------------
ஒருவன் தன் மனைவியை அன்றி பிற
மகளிரின் மேல் ஆசை வைத்தால்,
அஃது அவனிடத்து உள்ள ஞானம், செல்வம், கல்வி என்னும் மூன்றும் கெடுதற்கு அறிகுறியாகும் !
----------------------------------------------------------------------------------------
ஆக்கம் + இடுகை:
வை.வேதரெத்தினம்,
(veda70.vv@gmail.com)
ஆட்சியர்,
”நல்வழி” வலைப்பூ,
[தி.ஆ: 2051, சிலை (மார்கழி) ,21]
{05-01-2022}
-------------------------------------------------------------------------------------------------------
